星期六 , 24 10 月 2020
首頁 / 港聞 / 「黃絲」圍插杜汶澤左右逢源

「黃絲」圍插杜汶澤左右逢源

近排「黃店」互片到腥風血雨大家都見,「港獨」藝人杜汶澤噚日就喺facebook以「關於黃色經濟圈鬥爭之我見」為題寫文,先話「黃絲」對於「對與錯」有好強烈嘅執着,覺得有問題自然會出聲,所以有「內部鬥爭」係好正常嘅事,但之後就自打嘴巴,叫「黃絲」唔好互相批鬥,仲覺得要包容「偽黃」,話唔定最後會變真黃呢?唔少人就鬧爆杜汶澤自相矛盾,篇嘢頭一半就討好聲討龍門冰室嘅人,後一半就討好支持龍門冰室嘅人,根本就係想左右逢源。

杜汶澤寫長文先話「黃絲」對於「對與錯」有好強烈嘅執着,之後又話要包容「偽黃」,結果被「黃絲」圍插。

杜汶澤喺呢篇長文中,開頭講「黃店」內鬥時聲稱,「黃絲」對「對與錯」有好強烈嘅執着,覺得有問題自然會出聲,所以有內部鬥爭係好正常嘅事,應該係指緊「黃絲」批鬥龍門冰室係「人血龍門」一事。但佢突然話鋒一轉,就話「盲目批鬥」好有問題,「如果個內鬥建基於『你有幾黃呀?』『有冇我咁黃呀?』『你真黃定假黃呀?』咁就真係幾好笑。」

然後,佢就開始批鬥聲討「人血龍門」嘅「黃絲」,話佢哋唔見得人哋喺修例風波中受惠,所以心生妒忌而作出攻擊,繼而量度對方喺入面出咗幾多力,「如果你認為人哋『偽黃』,有十足證據就攞出嚟,無就忍下啦!」又叫「黃絲」畀個機會人,「或者有一日佢發覺扮唔到落去,進化到一個地步,『真心黃』呢?咁你咪多個兄弟囉 !」

杜汶澤呢篇自相矛盾嘅長文就被「黃絲」追擊,「Sun Leu」喺fb專頁「倫敦人西先生手記」入面鬧佢,淨係識盲目認顏色,唔識分是非黑白,「呢篇野(嘢)根本就係集大成於一身,頭一半就討好聲討龍門嘅人,後一半就討好支持龍門嘅人。條×樣想左右逢源,兩邊都唔得罪。」

網民譏「同偽中立有乜分別」

網民亦紛紛留言恥笑杜汶澤。「阿汛」話︰「個世界邊有可能食晒兩家茶禮,你當自己係咩,最×討厭兩邊都要討喜(好)又扮晒中間人,咁同啲偽中立有乜分別?」

「Ka Ming Fung」揶揄︰「佢好得意,上半段就話因為有思想所以會分對錯,拒絕盲撐。下半段就話見到偽黃都唔篤得,多個朋友好過多過敵人。呢啲係分對錯,有思想?精神分裂咋!」「Elaine Sumire」就「體諒」佢話︰「佢得返黃個market(市場),所以咪唔敢搞『聾門』驚得罪晒啲『黃絲』。」

發佈留言

Do NOT follow this link or you will be banned from the site!