星期五 , 14 8 月 2020
首頁 / 觀點 / 來論 / 來論|「中美關係」與「修昔底德陷阱」

來論|「中美關係」與「修昔底德陷阱」

/葉文斌

今日當大家忙住抗疫,仲諗緊口罩同漂白水响邊度買既時候,我想同大家分享另一個HOT TOPIC,就係之前每日新聞都會講既「中美關係」。

中美貿易戰好似最近就緩和左,甚至美國總統特朗普都出聲讚中國話:「中國抗疫表現專業」;但另一邊廂,有啲人就話今次新型冠狀病毒,其實係美國打嘅「病毒戰」。嗱,大家唔好以為無可能呀,同大家講下故仔先,好似何志光都有講過,係2013年4月無線新聞台,加拿大有條友叫尼爾森,當年68歲,曾任加拿大食品檢驗局首席研究員,當時佢任内前兩年(即2011年)由渥太華前往中國途中,被警方截查,在其行李搜出裝有布魯氏桿菌既藥瓶,呢隻菌可以寄宿係動物上,人類接觸或進食呢D動物之後,可能會被傳染,出現類似流感病徵,美軍係上世紀五十年代,曾經嘗試以呢隻菌製作生化武器,所以話真係乜都可能會發生。

尼爾森
尼爾森

我就無水晶球啦,唔知道今次係咪真係關事,我唯有希望科學家、醫生等專家,盡快搵出真正既源頭,同埋教我地點樣去處理。另外就係多D去睇資料,學多啲、知多啲。我最近就睇左本書,呢本好野嚟,都係度推薦俾大家,本書個名就叫做《注定一戰 – 中美能否避免修昔底德陷阱》,作者係前美國國防部特別顧問、美國哈佛大學甘迺迪政府學院貝爾福科學和國際事務研究中心前主任Graham Allison(格雷厄姆.艾利森)。咁本書講咩既呢?主要講「修昔底德陷阱」。

Graham Allison(格雷厄姆.艾利森)
Graham Allison(格雷厄姆.艾利森)
《注定一戰 – 中美能否避免修昔底德陷阱》
《注定一戰 – 中美能否避免修昔底德陷阱》

如果大家GOOGLE一下「修昔底德陷阱」,你就會發現有好多野走出黎。又係時候講下故仔啦,「修昔底德」其實係一個人嚟嘅,係公元前460年至400年左右一個古希臘歷史學家、思想家,以著作《伯羅奔尼撒戰爭史》傳世,他亦都係一個曾在戰爭中服役嘅雅典將軍。本書記述左公元前5世紀既一場重要戰爭,就係雅典同斯巴達。當時斯巴達就係一個軍國主義象徵,組織原則就係最大限度地發揮其戰鬥人員的生命力和實力,男仔一夠7歲就會入軍事學校。斯巴達公民把勇敢、英武和紀律等軍隊價值看得高於一切,斯巴達人在記憶中無咩遭受過軍事失敗,因為真係「好打得」;而雅典呢,就是一個港口城市,以其文化為榮,係「質易民族」。(講講下好似講AOE咁,呢個集體回憶真係要搵日開個LIVE同大家傾下,舊年年尾出左個新VERSION。)

講番希臘先,兩個地方不斷發展,直至到有次波斯人入侵希臘,斯巴達就出最大力,因為佢係軍事強國,有300名精英戰士捨身取義,阻擋左整個波斯軍隊;至於雅典的艦隊就以一敵三,摧毀左波斯艦隊。自此之後,雅典就覺得自己威威啦,係戰爭中發揮左關鍵作用,開始有D唔聽斯巴達話既舉動,斯巴達既領導人感覺到威脅,最後發動戰爭。但係修昔底德本人,其實無提過「修昔底德陷阱」,「陷阱」兩個字係後人加落去,根據Allison係本書自序既主要描述,當一個崛起強權(RISING power)的力量強大到足以威脅目前占據主宰地位統治強權(RULING power)嘅時候,「小心危險」警鐘就會響起。除非雙方都採取艱鉅和痛苦的行動來避免衝突,崛起強權和統治強權將在走向戰爭的過程中。咁係頭先希臘個故仔,統治強權係邊個國家?斯巴達囉!如果依家呢就係美國;崛起強權呢?希臘就係雅典,依家就係中國。

了解左呢個背景之後,大家對於貿易戰呢類中美之間嘅衝突既出現,係咪覺得好理所當然同埋好難避免呢?修昔底德講過「是雅典的崛起,以及斯巴達揮之不去的恐懼,使戰爭不可避免」,咁就大獲啦,係我地有生之年,會唔會睇到第三次世界大戰?雅典同斯巴達之間既三次流血衝突,終結左希臘文化的黃金時代,斯巴達最後係贏左,不過佢嘅聯盟網絡受損,財富亦大大減少;戰爭亦敲響左雅典帝國既喪鐘。

好在,中國已經將個答案話咗俾大家聽,中國係首個將「修昔底德陷阱」概念引進外交話語體系中的國家,中國領導人2015年訪美出席歡迎晚宴時表示:「世界上本無修昔底德陷阱,但大國之間一再發生戰略誤判,就可能自己給自己造成修昔底德陷阱」。我嘅理解係其實叫做「陷阱」可能唔成立,本身就無呢樣野,可能係大家諗多咗,又或者係,有人或有國家專登利用呢個現象和心理,借啲咦就諗衰野,明明去侵略人又話要出兵幫你保護安全呀之類、明明去踩人場又講到要保障航行自由,就咁有機會真係令自己跌落個陷阱度。

視頻版,請點下面:

https://www.facebook.com/watch/?v=503538690346918

https://www.weibo.com/tv/v/ItK6REcSD?fid=1034:4470886896435209

 

(筆者為:扶貧委員會委員、關愛基金專責小組委員、社會創新及創業發展基金專責小組委員、回收基金諮詢委員會委員)

發佈留言

Do NOT follow this link or you will be banned from the site!