星期二 , 2 3 月 2021
首頁 / 焦點 / 「本土肉女」網賣肉照 自我物化惹「狗」咬

「本土肉女」網賣肉照 自我物化惹「狗」咬

年輕女性身軀何價?網名「圓咕碌」的中文大學學生會幹事會前常務幹事黃于喬一直行「女權主義」路線,成日話人物化女性,但佢近日就話畀大家聽,佢嘅露肉照最平8蚊美金一個月就有得睇。話說佢唔抵得「熱青城」啲人成日去Instagram睇佢嘅露肉照又評頭品足,反正都鍾意露,前日索性去一個付費睇相嘅網上平台開檔,畀25蚊美金已經睇到佢嘅裸照。將身體當商品出售,今鋪自然又俾「熱青城」全面狂踩,「藍鳳凰」就一針見血話︰「話自己女權分子,轉頭就賣弄女性身體,呢啲係咩女權分子?」

班激進「本土派」搵水其實都幾有計,有「眾籌」啦、「課金」啦,總之就係冇單冇據佢哋自己食咗幾多都唔知。一向都有露肉癮嘅圓咕碌,之前已經放過啲近乎裸上半身嘅相出嚟,之後又呻俾麻甩佬了,向網民展示自己胴體之後,又可以大談自己女權主義嘅諗法,可能佢都覺得幾過癮。
近日,佢可能唔抵得成日俾「熱青城」啲人偷佢圖去周圍唱,又或者覺得呢條都係財路噃,就去咗一個付費睇相嘅網上平台開檔︰「有時d(啲)相覺得幾靚,不過要upload(上載)都係好淆,香港人個尺度太低,性格太八,鍾意睇人pk,鍾意羞辱人,嚴正考慮d(啲)真係靚嘅相要收費睇,免得班人一路免費睇一路嘈嘈嘈(會窮)。」

然後佢仲自己整咗個三級制plan(計劃),第一級係畀8蚊美金一個月,可以睇到佢嘅「獨有照片」,第二級就25蚊美金一個月,有「更大膽照片及影片」,第三級40蚊美金一個月,叫做「All You Can Experience(所有你可以體驗的)」。佢前晚凌晨正式開檔,並且已經貼咗自己第一張裸照出嚟啦。

對於呢種行為,真係平時露開肉、着剩條底褲去主持嘅「熱狗」都唔夠佢嚟,而見到自己嘅死敵「自甘墮落」,「熱青城」中人當然唔放過力踩圓咕碌嘅機會。

「藍鳳凰」就喺facebook出文話︰「話自己女權分子,轉頭就賣弄女性身體,呢啲係咩女權分子?」親「熱狗」嘅「Lavander Toulouse」亦揶揄︰「已經冇人可以阻止到佢賣肉賺錢了。以前有個笑話:女大學生做雞=不知羞恥;妓女兼職讀大學=勤奮上進。現在改成:妓女賣肉賺錢=物化女性;女權份(分)子賣肉賺錢=身體自主。」「陳四」亦整咗個簡潔版嘅批評話︰「當影性感相俾人話大波:物化女性。當影性感相收錢俾(畀)人睇:勞動光榮。」

大家都估緊圓咕碌之後會點回應。「Kei Hing Lee」就話︰「轉頭又話係社會實驗信唔信?」「Man Yue LO 」就謂︰「等睇佢賣完裸照,又唔肯認係賣淫。」「King Leung」就仔細回應︰「當人有人指出佢道德問題,佢就話人保守。當有人話佢同做裸模一樣,佢就話唔好侮辱『所有女性』,要尊重『所有女性』,捍衛女權。其實根本無人走去話埋其他女性,人哋只係話佢一個,佢就拉埋『所有女性』落水。」

其實,呢種行為普遍大眾都唔係咁接受,但始終係「明買明賣」,而「熱狗」等人就冇咩資格話人囉,一句講晒︰「笑什麼,你也是賣肉做直播等課金。」

 

Do NOT follow this link or you will be banned from the site!